नाइजरमा विद्रोहका कारण अवस्था बिग्रियो

एजेन्सी । अफ्रिकी देश नाइजर विगत केही दिनदेखि चर्चामा छ । नाइजरको सेनाले देशका राष्ट्रपति मोहम्मद बजुमलाई हिरासतमा लिएपछि विद्रोहको घोषणा गरेको थियो। सेनाका अधिकारीहरूले पनि टिभीमा आएर यसको घोषणा गरेका थिए। यो घटनापछि विश्वका धेरै देशले यसको निन्दा गरेका छन् । अवस्था दिनप्रतिदिन बिग्रदै गएको छ । रिपोर्टका अनुसार अफ्रिकामा नाइजरलाई लिएर भयानक युद्ध सुरु हुन सक्छ।

पश्चिम अफ्रिकी देशका सेना प्रमुखको पनि आज कूबारे बैठक बस्दैछ । इकोनोमिक कम्युनिटी अफ वेस्ट अफ्रिकन स्टेट्सको बैठक नाइजेरियाको राजधानी अबुजामा हुन लागेको हो ।

यसअघि बैठकमा सहभागी सबै देशले विद्रोहमा संलग्न सैनिक अधिकारीलाई राष्ट्रपति मोहम्मद बजुमलाई रिहा गर्न अल्टिमेटम दिएका थिए ।

सेना प्रमुखको यो बैठकमा नाइजरमा भएको ‘कु’का विषयमा महत्वपूर्ण निर्णय हुन सक्नेछ । विद्रोहविरुद्ध सैन्य कारबाहीको घोषणा हुन सक्ने सम्भावना व्यक्त गरिएको छ ।