एजेन्सी । इजरायल र हमासबीच जारी युद्धले अहिले भयानक रूप लिएको छ । यो युद्धमा दैनिक सयौं मानिसले ज्यान गुमाइरहेका छन् ।
गाजामा हालसम्म ११ हजारभन्दा बढी मानिसको मृत्यु भइसकेको छ भने २६ हजारभन्दा बढी घाइते भएको बताइएको छ ।
यसका बाबजुद पनि गाजामा इजरायली आक्रमण जारी छ ।
करिब ४० दिनको युद्धपछि हमासले ७० जना बन्धकहरूलाई रिहा गर्न राजी भएको छ ।
तर यसका लागि हमासले इजरायलसमक्ष विशेष शर्त राखेको मिडिया रिपोर्टमा उल्लेख छ ।
हामासले पाँच दिनको युद्धविरामपछि ७० जना बन्धकहरूलाई रिहा गर्ने बताएको छ
अल कसम ब्रिगेडले यो प्रस्ताव इजरायलसमक्ष राखेको छ ।
यस प्रस्ताव मार्फत हमासले यदि इजरायलले गाजामा पाँच दिनको लागि आक्रमण रोक्छ भने, आफुहरु ७० जना बन्धकहरूलाई रिहा गर्न तयार हुने बताएको छ । ७० जना महिला र बालबालिका रिहा गर्ने हमासले बताएको छ ।
