एजेन्सी । इजरायल र हमासबीचको युद्धको आज ४१ औं दिन हो । एकातिर इजरायली सेनाले गाजाको अल शिफा अस्पताललाई युद्धको क्षेत्र बनाएको छ भने अर्कोतर्फ इजरायल र हमासबीच ब्याक च्यानल वार्ता पनि चलिरहेको समाचार एजेन्सी रोयटर्सले जनाएको छ ।
मध्यपूर्वी देश कतारको मध्यस्थतामा दुई समूहबीच युद्धविराम गराउने प्रयास भइरहेको छ । यदि यी वार्ताहरू आफ्नो गन्तव्यमा पुग्छन् भने इजरायलले तीन दिनको युद्धविरामको घोषणा गर्न सक्छ। बदलामा, हमासले लगभग ५० बन्धकहरूलाई रिहा गर्न सक्छ।
अमेरिकाको निगरानीमा भइरहेको यस वार्तामा इजरायलले इजरायली जेलमा रहेका केही प्यालेस्टिनी महिला र बालबालिकालाई रिहा गर्ने पनि चर्चा भइरहेको छ । साथै, मानवीय सहायता, आपूर्ति, पानी, औषधिहरू गाजामा छिटो पुग्न अनुमति दिन आग्रह गरिएको बताइएको छ ।
यद्यपि, कति प्यालेस्टाइनी महिला र बालबालिकालाई हमासले रिहाइका लागि शर्त राखेको छ भन्ने अझै स्पष्ट भएको छैन।
हमासले यो सम्झौतालाई हरियो संकेत दिएको छ तर इजरायल अझै अनिच्छुक रहेको मिडिया रिपोर्टमा उल्लेख छ। इजरायलले यस युद्धविराम मस्यौदामा थप वार्ता गर्न चाहेको बताइएको छ।
यदि यो छलफल सफल भयो भने, यो अक्टोबर ७ मा हमासद्वारा बन्धक बनाएका मानिसहरूको सबैभन्दा ठूलो रिहाई हुनेछ।
