काठमाडौँ । गाजा क्षेत्रमा इजरायली सेनाले ठूलो क्षति ब्यहोरेको छ । इजरायलको सेनाले मंगलबार जनाएअनुसार एकै ठाउँ भएको हमलामा २१ जना सैनिक मारिएका हुन् ।
इजरायल डिफेन्स फोर्सेज (आईडीएफ) का प्रवक्ता ड्यानियल हजारीका अनुसार गाजा क्षेत्रस्थित एक भवनमा सैनिक बसिरहेका बेला रकेट हमला भएको हो ।
उनका अनुसार इजरायली सुरक्षा बलले भवनलाई उडाउने उद्धेश्यसहित जुन विस्फोटक राखिएको थियो, त्यो समेत विस्फोट हुन पुगेको हो । आईडीएफले अहिले यस घटनाको जाँच अनुसन्धान चलिरहेको जनाएको छ ।
इजरायलले गत ७ अक्टोबरमा भएको हमलापछि हमासविरुद्ध युद्धमा छ । गाजामा सैन्य कारबाही तीव्र भइरहँदा इजरायलले एकै ठाउँमा ठूलो धक्का ब्यहोरेको हो ।
इजरायलले हमासलाई समाप्त नपारुन्जेल अभियान जारी रहने जनाएको छ । ७ अक्टोबरमा हमासको हमलाबाट १३ सय मानिस मारिएका थिए ।
त्यसपछि इजरायलले थालेको हमलाका कारण अहिलेसम्म गाजा क्षेत्रमा २५ हजार मानिस मारिइसकेका छन् ।
