काठमाडौँ । भारतका विदेश सचिव विक्रम मिस्री आज नेपाल भ्रमणमा आउँदैछन् । परराष्ट्र सचिव सेवा लम्सालको निमन्त्रणामा उनी दुई दिने भ्रमणमा नेपाल आउन लागेका हुन् ।
सचिव लम्सालले भारत भ्रमणमा गएका बेला भारतीय सचिव मिस्रीलाई नेपाल भ्रमणको निमन्त्रणा दिएका थिए । जुलाईमा भारतको विदेश सचिवमा नियुक्त हुनु भएका मिस्रीले हालै भुटानको भ्रमण गरेका थिए ।
भ्रमणका अवसरमा दुई देशबीचको सम्बन्ध थप सुदृढ बनाउने र पारस्परिक हितका विषयमा दुई पक्षबीच कुराकानी हुने परराष्ट्र मन्त्रालयले जनाएको छ ।
भ्रमणको क्रममा भारतीय सचिव मिस्रीले नेपालका राष्ट्रपति रामचन्द्र पौडेल, प्रधानमन्त्री केपी शर्मा ओली, परराष्ट्रमन्त्री आरजु राणा देउवालगायतका शीर्ष नेताहरूसँग भेट गर्ने कार्यक्रम रहेको जनाइएको छ ।
भारतीय सचिव मिस्री सोमबार स्वदेश फर्कने परराष्ट्र मन्त्रालयले जनाएको छ ।
