एजजेन्सी । प्यालेष्टाइनी भुमी गाजाको खान युनिस शहरमा ६ जना इजरायली बन्धकहरूको शव फेला परेको छ । इजरायलले गरेको सैन्य कारवाहीका क्रममा ६ जनाको शव बरामद गरिएको हो ।
इजरायली डिफेन्स फोर्स आइईडीएफका अनुसार ती ६ जना इजरायली नागरिकहरु गत अक्टोबर ७ मा हमासले अपहरण गरेका ब्यक्तिहरु हुन् । ती शवहरु हमासले निर्माण गरेको सुरुङमा फेला परेको हो ।
इजरायली प्रधानमन्त्री बेन्जामिन नेतान्याहुले एक विज्ञप्ति जारी गर्दै ६ जना बन्धकको शव बरामद गरेकोमा दुख व्यक्त गर्दै ती छ जनाकै शव इजरायल फिर्ता ल्याउन सफल भएको प्रतिक्रिया दिएका छन् । साथै उनले गाजामा आफना सैनिकले जारी राखेको काम कारवाहीको प्रशंसासमेत गरे ।
यसैबीच इजरायलका रक्षा मन्त्री योभ गालान्टले हमासको नियन्त्रणमा रहेका इजरायलमा बन्धकहरूलाई फिर्ता गर्ने र हमासलाई ध्वस्त पार्ने अभियानमा आफुहरु रहेको जानकारी दिए ।
शव बरामद गरिएका ६ जना गाजा सीमा नजिकको किबुट्ज निर ओजका बासिन्दाहरु रहेकोमा हमासको कब्जामा परेका थिए ।
तीमध्ये मुन्डर नामका इजरायली नागरिकसँगै उनकी श्रीमती, छोरी र नातिपनि अपहरणमा परेकोमा मुन्डर बाहेक श्रीमती र नातीलाई गत नोभेम्बरमा इजरायल र हमासबीचको अस्थायी युद्धविरामको क्रममा रिहा गरिएको थियो भने मुन्डरका छोरा रोई आक्रमणको क्रममा मारिएका हुन् ।
ती ६ जना बन्धकको शव इजरायल ल्याएर परिवारजनलाई बुझाइएको छ ।
