एजेन्सी । अमेरिकी राष्ट्रपति जो बाइडेनले युक्रेनलाई अमेरिकी सरकारले सहयोग जारी राख्ने प्रतिबद्धता दोहार्याएका छन् ।
ब्राजिलको रियो दि जेनेरियोमा जारी जी–२० सम्मेलनमा बाइडेनले सहयोगको प्रतिबद्धता दोहार्याएका हुन् । युक्रेनलाई रुसको भित्री भाग सम्म मार हान्न लोमो दुरीको क्षेप्यास्त्र प्रयोगको अनुमति दिए लगत्तै उनको प्रतिबद्धता आएको हो ।
जी–२० सम्मेलनको सत्रमा बोल्दै बाइडनले विश्वभरको सुरक्षा सुधारको प्रगतिलाई ध्वस्त पार्ने द्वन्द्व र संकटको अन्त्य गर्न मिलेर काम गर्नुपर्ने बताए । बाइडेनले इजरायल–गाजा युद्धबिरामका लागि हमास माथि दबाब सिर्जना गर्न विश्वका आर्थिक सम्पन्न राष्ट्राध्यक्षहरुलाई आग्रह समेत गरेका छन् ।
अन्तर्राष्ट्रिय सञ्चार माध्यमका अनुसार राष्टसंघका लागि अमेरिकी राजदूत लिन्डा थोमस ग्रीन फिल्डले युक्रेनलाई अगामी दिन अमेरिकाले थप सहयोग गर्ने बताए । यसैबीच, जर्मनीले युक्रेनलाई लामो दुरीको मिसाइल प्रयोगको अनुमति नदिने आफ्नो अडानमा कायम रहेको बताएको छ ।
जर्मनी चान्सलर ओलाफ स्कोल्जले आफूहरुले नीति परिवर्तन नगर्ने स्पष्ट पारेका हुन् । तर, जर्मनीले आर्टिफिसियल इन्टेलिजेन्स अर्थात् एआई बाट निर्देशित चार हजार ड्रोन युक्रेनलाई दिने बताइएको छ । जी–२० सम्मेलनमा युरोपियन युनियन सहित २० आर्थिक सम्पन्नता भएको देशका राष्ट्राध्यक्षहरु भेला भएका छन् ।
सम्मेलन मुख्यतः वैश्विक अर्थव्यवस्था, जलवायु परिवर्तन, गरिबी निवारण र भोकमरी विरुद्ध लड्ने विषयमा केन्द्रित हुने बताइएको छ ।
