एजेन्सी । अमेरिकाले युक्रेनलाई २ अर्ब ५० करोड डलरको सुरक्षा सहायता प्याकेजको घोषणा गरेको छ ।
राष्ट्रपतिमा निर्वाचित डोनाल्ड ट्रम्पले पदभार ग्रहण गर्नुअघि किएभलाई सहायता प्रदान गर्न वासिङ्टनले हतार गरिरहेको छ । सोमबारको सहायतामा १ अर्ब २५ करोड डलरको सैन्य ‘ड्रडाउन प्याकेज’ समावेश छ । यसले पेन्टागनलाई अमेरिकी भण्डार बाट हतियार लिएर तिनलाई छिटो युद्धभूमिमा पठाउन अनुमति दिन्छ ।
अन्तर्राष्ट्रिय सञ्चार माध्यमका अनुसार अर्को १ अर्ब २२ करोड डलर युक्रेन सुरक्षा सहायता पहल मार्फत वित्त पोषण गरिनेछ । यस अन्तर्गत रक्षा उद्योग वा साझेदारहरू बाट सैन्य उपकरणहरू खरिद गरिन्छ ।
युक्रेनी जनताले रूसी आक्रमण बाट आफ्नो स्वतन्त्रता र स्वाधीनताको रक्षा गर्न जारी राख्दै गर्दा युक्रेनलाई करिब दुई अर्ब ५० करोड डलर सुरक्षा सहयोगको घोषणा गर्न पाउँदा गर्व लागेको अमेरिकी राष्ट्रपति जो बाइडेनले विज्ञप्ति मार्फत जनाएका छन् ।
बिदाइ हुन लागेको बाइडेन प्रशासनले ट्रम्प जनवरीमा सत्तामा आउन अघि युक्रेनलाई सके सम्म धेरै सहायता प्राप्त गर्न काम गरिरहेको समाचारमा उल्लेख छ ।
