एजेन्सी । टर्कीमा सरकार विरोधी प्रदर्शन चर्कदै गएको छ । मुख्य शहर इस्तानबुलका नगर प्रमुख एक्रम इमामोग्लुलाई बुधवार भ्रष्टाचारको आरोपमा पक्राउ गरिएपछि प्रदर्शन शुरु भएको हो ।
अन्तर्राष्ट्रिय सञ्चार माध्यमका अनुसार ६ दिनसम्मको लगातार प्रदर्शनले इस्तानबुलमा जनजीवन अस्तव्यस्त बनेको छ । प्रदर्शन दबाउन सरकारले १ हजार ३ सय जना बढीलाई पक्राउ गरेको छ । नगरप्रमुख इमामोग्लुलाई टर्कीका राष्ट्रपति रेसेप तैयप एर्डोगानको मुख्य प्रतिस्पर्धी मानिन्छ ।
आफ्ना राजनीतिक प्रतिस्पर्धीलाई जेल हालेर एर्डोगानले तानाशाही शासन चलाउन खोजेको विपक्षीहरुको आरोप छ । एर्डोगानले भने विपक्षीहरुले देशमा हिंसा निम्त्याउन खोजेको आरोप लगाएका छन् । विपक्षी दलले कसैको उक्साहटमा टर्कीको प्रजातान्त्रिक इतिहासमै खराब प्रदर्शन गरिएको उनको दाबी छ ।
सन् २०२८ को राष्ट्रपतीय चुनावका लागि उम्मेदवार घोषणा हुनुभन्दा केही दिनअघि बुधबार इस्तानबुलका प्रमुखलाई इमामोग्लुलाई भ्रष्टाचार र चरमपन्थी समूहलाई सहयोग गरेको आरोपमा पक्राउ गरेपछि विरोध चर्किएको हो ।
प्रदर्शनकारीहरुले सरकारविरुद्ध चर्को नाराबाजी गर्नुका साथै ठाउँठाउँमा आगजनी र तोडफोड समेत गरेका छन् । स्थिति नियन्त्रणमा लिने क्रममा प्रदर्शनकारी र प्रहरीबीच झडप हुँदा दर्जनौ घाइते भएको समाचारमा उल्लेख गरिएको छ ।
