एजेन्सी । अमेरिकी राष्ट्रपति डोनाल्ड ट्रम्पले चिनियाँ सामानलाई लक्षित गरी गरेको कर वृद्धिले धेरै उत्पादनमा १४५ प्रतिशत कर पुगेको छ । ट्रम्पको आदेश अनुसार ह्वाइट हाउसले दर्जनौँ देशको ९० दिनका लागि कर वृद्धिको योजनालाई थाती राखेपनि चीनविरूद्ध लगातार कर वृद्धिको घोषणा गरेको हो ।
अन्तर्राष्ट्रिय सञ्चार माधयमका अनुसार चिनियाँ आयातमा नयाँ करको घोषणा गर्दै कुल कर दर १२५ प्रतिशत पुगेको थियो । पछिल्लो कर फेन्टानिल आपूर्ति श्रृङ्खलामा चीनको कथित भूमिकालाई लिएर यस वर्षको शुरुमा २० प्रतिशत अतिरिक्त शुल्क थपिएको हो । यससँगै ट्रम्पले यो वर्ष चिनियाँ उत्पादनमा लगाएको कुल कर १४५ प्रतिशत पुगेको हो ।
यसमा स्टिल र आल्मुनियमको आयात साथै सवारी साधन जस्ता उत्पादनहरू समावेश गरिएको छैन । ट्रम्पले आफ्नो फरक फरक कार्यकालमा अलगअलग गरी २५ प्रतिशत कर लगाएका थिए । यो सङ्ख्या तामा, फार्मास्युटिकल्स, सेमीकण्डक्टर, काठ र ऊर्जा उत्पादन जस्ता सामानमा पनि लागू नहुने बताइएको छ ।
राष्ट्रपति ट्रम्पले चिनिया सामानको आयातमा अप्रिल ९ देखि १०० प्रतिशतभन्दा बढी कर लगाउने चेतावनी दिएसँगै दुई देशबीच पूर्ण स्तरको ‘व्यापार युद्ध’ हुने सम्भावना देखिएको छ । चीनले अमेरिकासँग नझुक्ने र ‘अन्तिमसम्म लड्ने’ बताएको छ ।
अमेरिकी निर्णयको जबाफ दिँदै चीनले पनि अमेरिकी सामानको आयातमा कडाइ गरेको समाचारमा उल्लेख छ ।
