एजेन्सी । गाजामा पछिल्लो समय भोकमरीका कारण १५ जनाको मृत्यु भएको छ ।
मृत्यु हुनेमा ६ साताका शिशु पनि रहेका छन् । हमास र इजरायलबीचको युद्धमा पिल्सिएका सर्वसाधारण खाद्यान्नको अभावका कारण भोकमरीको शिकार बनेको हो ।
अन्तर्राष्ट्रिय सञ्चार माध्यमका अनुसार गाजाको स्वास्थ्य मन्त्रालयका अनुसार अक्टोबर ७ सन् २०२३ मा इजरायले गाजामा आक्रमण शुरु गरे यता भोक र कुपोषणका कारण ८० बालबालिका सहित कम्तीमा १ सय १ जनाको मृत्यु भइसकेको छ ।
गत मार्चमा इजरायलले गाजामा सबै आपूर्ति पूर्ण रूपमा रोेक्का गर्दा खाद्य भण्डार सकिएपछी गाजाका सर्वसाधारण भोकभाकै बस्न बाध्य भएको हो । मे महिनामा केही हदसम्म नाकाबन्दी हटाएर अमेरिकी र इजरायली मध्यस्थतामा बिदेशी अनुदानको खाद्यान्न सहायता गाजामा प्रवेश गर्न दिइएको थियो । तर, पर्याप्त खाद्यान्न नहँुदा बिशेष गरी बालबालिका र बृद्धबृद्धा भोकमरीको शिकार हुने गरेका छन् ।
यसैबीच संयुक्त राष्ट्रसंघका महासचिव एन्टोनियो गुटेरेसले भने १० लाख गाजावासीको अवस्था त्रासदीपूर्ण रहेको जनाएका छन् ।
