एजेन्सी । खालिस्तानी आतंकवादी हरदीप सिंह निज्जरको क्यानडामा गोली हानी हत्या भएको छ । क्यानडाको सरेस्थित गुरुनानक सिंह गुरुद्वारा नजिकै दुई मोटरसाइकलमा आएका अज्ञात बन्दुकधारीले निज्जरमाथि गोली हानेर भागेका थिए ।
निज्जर क्यानडामा सिख फर जस्टिसका प्रमुख र खालिस्तानी टाइगर फोर्सका प्रमुख पनि थिए।
उनले क्यानडामा बसेर भारतविरुद्ध राष्ट्रविरोधी गतिविधि गरिरहेको आरोप लागेको थियो ।
सन् २०२१ मा पञ्जाबको जालंधरमा हिन्दू पुजारीको हत्यामा हरदीप सिंह निज्जरको नाम आएको थियो । यसबाहेक राज्यका अन्य धेरै घटनामा उनको भूमिका रहेको बताइएको थियो ।
गत वर्ष पनि राष्ट्रिय अनुसन्धान एजेन्सी (एनआईए) ले हरदीप सिंहमाथि १० लाख रुपैयाँ पुरस्कारको घोषणा गरेको थियो।
यसै क्रममा भारत सरकारले निज्जरलाई वान्टेड आतंकवादी घोषणा गरेको थियो । उनको नाम भारत सरकारले जारी गरेको ४० मोस्ट वान्टेड आतंकवादीको सूचीमा पनि रहेको थियो ।
