लण्डन । लण्डनबाट दिल्ली जाँदै गरेको एयर इन्डियाको अन्तर्राष्ट्रिय उडानमा पाइलटले आफ्नो ड्युटी टाइम सकिएको भन्दै विमान नउडाउने भनेपछि यात्रुहरुले दुःख पाएको मिडिया रिपोर्टमा उल्लेख छ ।
दिल्लीको खराब मौसमका कारण आइतवार तीन अन्तर्राष्ट्रिय र दुई घरेलु उडानहरू जयपुरमा डाइभर्ट गरिएको थियो। जसमा एयर इन्डियाको दुई, स्पाइसजेटको दुई र गल्फ स्ट्रिमको एउटा उडान समावेश थिए।
सोही क्रममा पाइलटले ड्युटी टाइम सकिएको भन्दै जयपुरस्थित एयर इन्डियाको अन्तर्राष्ट्रिय उडान छोडे ।
विमानमा सवार करिब १५० यात्रु जयपुर विमानस्थलमा ६ घण्टासम्म समस्यामा परेका थिए । पछि उनीहरुलाई बायरोड दिल्ली पठाइयो ।
एयर इन्डियाको फ्लाइट नम्बर एआई–११२ बिहान ६ बजे लण्डनबाट दिल्ली पुग्ने समय थियो तर खराब मौसमका कारण उडानलाई जयपुरतर्फ डाइभर्ट गरिएको थियो ।
त्यसपछि विमान जयपुरमा अवतरण गर्दा त्यसका २ जना पाइलटले ड्युटी टाइम सकिएको भन्दै विमान छोडे ।
त्यसपछि यात्रुहरु निकै त्रसित भएका थिए । सबै यात्रुलाई गन्तव्यमा पुर्याउने तयारी गरिएको थियो ।
यससँगै यात्रुको असन्तुष्टि हटाउन विमानस्थल प्राधिकरणले उनीहरुलाई खाना र अन्य सुविधा उपलब्ध गराएको थियो ।
