एजेन्सी । रुस र युक्रेनबीच विगत १५ महिनादेखि युद्ध चलिरहेको छ । यो युद्धमा न पुटिनले जितेका छन् न जेलेन्स्की हारेका छन् । यस्तो अवस्थामा दुई देशबीचको यो युद्ध कहिलेसम्म चल्छ भन्न गाह्रो छ ।
यसैबीच एउटा ठूलो खबर बाहिर आएको छ ।
पाँच सय दिनको यो युद्धमा रुसका ५० हजार सैनिकको मृत्यु भएको छ ।
यो कुरा एक अध्ययनमा खुलासा भएको हो ।
२४ फेब्रुअरी २०२२ मा रुस र युक्रेनबीच युद्ध सुरु भएको थियो, जुन अहिले पनि जारी छ ।
जुलाई ८ मा युक्रेन युद्धको ५ सय दिन पूरा भएको थियो ।
रुस–युक्रेन युद्धको ५०० दिन पूरा भएपछि दुई रुसी मिडिया आउटलेटहरू मिडियाजोना र मेडुजाले जर्मनी विश्वविद्यालयका डाटा वैज्ञानिकहरूसँग मिलेर अध्ययन गरेका थिए।
यस अध्ययनका अनुसार युक्रेन युद्धमा हालसम्म ५० हजार रुसी सैनिक मारिएका छन् ।
तर, रुसले यस युद्धमा आफ्ना ६ हजार सैनिक मात्र मारिएको बताएको छ ।
यस नयाँ अध्ययनमा मे २०२३ सम्म युक्रेन युद्धमा ४७ हजार रुसी सैनिक मारिएको बताइएको छ ।
अध्ययनका अनुसार गत वर्ष अर्थात २०२२ मा २५ हजार सैनिकको मृत्यु भएको थियो । यसमा विभिन्न उमेर समूहका मानिसहरुको सहभागिता रहेको थियो ।
