काठमाडौं । सरकारले यस वर्ष नेपालमा डेङ्गु सङ्क्रमणले भयावह रूप लिनसक्ने चेतावनी दिएको छ ।
इपिडिमियोलोजी तथा रोग नियन्त्रण महाशाखा ईडीसीडीले साठी हजारभन्दा बढी नागरिक डेङ्गुबाट सङ्क्रमित हुनसक्ने चिन्ताजनक आँकलन सार्वजनिक गरेको हो ।
मनसुन सक्रिय भएसँगै डेङ्गु फैलाउने लामखुट्टेको प्रजनन तीव्र हुने हुँदा आउँदा दिनहरू थप चुनौतीपूर्ण बन्ने सङ्केत देखिएको छ । महाशाखाको किटजन्य शाखाका प्रमुख डा. गोकर्ण दाहालले डेङ्गुको जोखिम उच्च रहेको बताउछन ।
महाशाखाका अनुसार हालसम्म ७३ जिल्लामा डेङ्गु फैलिसकेको छ । १ हजार ६ सय जनामा सङ्क्रमण पुष्टि भइसकेको छ । तर, यो सरकारी तथ्याङ्कभन्दा वास्तविक सङ्क्रमितको सङ्ख्या निकै बढी हुनसक्ने सरकारको आंकलन छ ।
धेरै बिरामीमा लक्षण नदेखिने, देखिएकाले पनि परीक्षण नगराउने र परीक्षण भएका केहीको रिपोर्टिङ प्रणालीमा नआउने कारणले वास्तविक तथ्याङ्क बाहिर आउन नसकेको विज्ञको भनाइ छ ।
सङ्क्रमणको बढ्दो जोखिमलाई मध्यनजर गर्दै सरकारले आवश्यक कार्ययोजना बनाएर कार्यान्वयनको चरणमा लगेको महाशाखाले जनाएको छ ।
