नक्कली शरणार्थी प्रकरणमा मुछिएका १६ जना आरोपितको बयान आजबाट

काठमाडौँ। नक्कली भुटानी शरणार्थी प्रकरणमा मुछिएका १६ जना आरोपितको बयान आजबाट शुरु हुँदैछ। जिल्ला अदालत काठमाडौँमा आजदेखि उनीहरुको बयान शुरु हुन लागेको हो।

नक्कली शरणर्थी प्रकरणमा मुछिएका ३० जनाविरुद्ध बुधबार ठगी, किर्ते लगायतको अभियोगमा मुद्दा दायर भएको छ। १४ जना फरार रहेकाले आज १६ जनाको मात्र बयान सुरु हुन लागेको हो। फरार रहेका १४ जनाको हकमा भने अदालतमा उपस्थित भएकै बेला बयान हुनेछ।

शुक्रबार आरोपित विरुद्धको मुद्दाको पेशी तोकिनेछ र सम्बन्धित न्यायाधीशको इजलासमा बयान हुन लागेको हो। इजलासले उनीहरुको एकैसाथ वा छुट्टाछुट्टै रुपमा समेत बयान गराउन आदेश दिन सक्नेछ।

नेपाली नागरिकलाई नक्कली भुटानी शरणार्थी बनाएर विदेश पठाउन खोजेको अभियोगमा पूर्वमन्त्रीहरु टोपबहादुर रायमाझी, बालकृष्ण खाँण, सचिव टेकनारायण पाण्डे लगायत विरुद्ध जिल्ला अदालतमा मुद्दा चलाएको छ।