चितवन। राष्ट्रिय स्वतन्त्र पार्टी (रास्वपा)ले चितवनमा सञ्चालनमा ल्याएको ना २ ख ५६१९ नम्बरको एम्बुलेन्स पुरानो मेडिकल कलेज भरतपुरलाई नै फिर्ता गरेको छ। विवादमा आएपछि रास्वपाका सभापति रवि लामिछानेले आफ्नो निर्वाचन क्षेत्र चितवन २ मा सञ्चालनमा ल्याएको एम्बुलेन्स फिर्ता गरेको हो।
लामिछानेले आफु निर्वाचित भएको एक सय दिन पुगेको अवसरमा पुरानो मेडिकल कलेजको एम्बुलेन्सको रंग बदलेर ‘मोबाइल क्लिनिक’ लेखेर सञ्चालनमा ल्याएका थिए। तर, एम्बुलेन्सको रंग बदलेर लामिछानेले गरेको यस्तो कार्य गैरकानुनी हुने देखिएपछि विवादमा आएको थियो।
भारतीय दूतावासले उक्त एम्बुलेन्स आजभन्दा ११ वर्ष अगाडि पुरानो मेडिकल कलेजलाई दिएको थियो। लामो समयदेखि नवीकरणसमेत नगरिएको उक्त एम्बुलेन्स गत साउन १४ गते जरिवाना तिरेर नवीकरण गरी मोबाइल क्लिनिकको रुपमा सन्चालमा ल्याएको घोषणा गरिएको थियो।
कानुनीरुपमा गलत हुने गरि नाम र रंग बदलेर लामिछानेले एम्बुलेन्सलाइ मेडिकल क्लिनिकका रुपमा चलाएपछि विवाद बढेको थियो। विवाद बढेपछि एम्बुलेन्स अस्पताललाई नै फिर्ता गरिएको हो। अब उक्त एम्बुलेन्सको सट्टा अर्को भ्यानको व्यवस्था गरेर मोबाइल क्लिनिकको रुपमा चलाउने तयारी रास्वपाले गरेको छ।
