प्रतिनिधिसभा बैठक बस्दै नबसी स्थगित

काठमाडौँ। आइतबारको लागि बोलाइएको प्रतिनिधिसभाको बैठक बस्दै नबसी स्थगित भएको छ। संसदको गतिरोध खुलाउने विषयमा दलहरुबीच सहमति हुन नसक्दा बैठक स्थगित भएको हो।

आइतबार सभामुख देवराज घिमिरेले बोलाएको दलका प्रमुख सचेतक तथा सचेतकहरुको बैठक र प्रधानमन्त्री पुष्पकमल दाहाल प्रचण्डले बोलाएको राष्ट्रिय मान्यताप्राप्त दलका शीर्ष नेताको बैठकले संसद सञ्चालन गर्ने विषयमा सहमति जुटाउन नसकेपछि ५ भदौसम्मका लागि संसद बैठक स्थगित गरिएको हो।

नेकपा एमालेले सुन तस्करी प्रकरण छानबिनका लागि उच्चस्तरीय समिति गठन हुनुपर्ने अडान राख्दै आएको छ। उता सत्तारुढ दलले पनि उच्चस्तरीय छानबिन समिति गठन नगर्ने अडान राखेपछि सहमति नजुटेको हो।