काठमाडौँ। प्रधानमन्त्री पुष्पकमल दाहाल प्रचण्डले अन्तराष्ट्रिय प्रतिवद्धता, सर्वोच्च अदालतको आदेश र पीडितलाई न्याय हुनेगरी शान्तिप्रक्रियाका बाँकी कामलाई टुंगोमा पुराउन सरकार प्रतिवद्ध रहेको बताएका छन्।
सोमबार काठमाडौँमा आयोजित नेपालमा संक्रमणकालीन न्यायसम्बन्धी कार्यक्रममा प्रधानमन्त्री दाहालले पीडितहरूलाई परिपूर्ति प्रदान गर्न र गम्भीर मानवअधिकार उल्लघनका दोषीहरूलाई न्यायको कठघरामा ल्याउन सङ्क्रमणकालीन न्याय सम्बन्धी प्रक्रियालाई टुंगोमा पुर्याउन सरकार प्रतिवद्ध रहेको बताएका हुन्।
नयाँ संविधान आफैमा शान्ति सम्झौताको उपज भएको भन्दै प्रधानमन्त्री प्रचण्डले संविधानमा उल्लेख संवैधानिक प्रतिबद्धता जनआन्दोलन र जनयुद्धका कारण मात्र सम्भव भएको बताए। पीडितलगायत सम्बन्धित सरोकारवालासँग परामर्श गरी संक्रमणकालीन न्यायसम्बन्धी विधेयकलाई समयसापेक्ष अघि बढाएको र संसदीय समितिबाट नै यसमा देखिएका जटिलताहरू समाधान हुने उनले दावी गरे।
त्यस्तै,प्रधानमन्त्री प्रचण्डले सबै पक्षलाई न्याय दिँदै संक्रमणकालीन न्यायसँग सम्बन्धीत विषयलाई निष्कर्षमा पुराउन पीडित, नागरिक समाज, राजनीतिक दल र अन्तर्राष्ट्रिय समुदायलगायत समाजका सबै क्षेत्रबाट बलियो सहयोग आवश्यक रहेको धारणा राखे।
