नेम्वाङको निधनमा प्रतिनिधि सभाबाट शोक प्रस्ताव पारित

काठमाडौँ। प्रतिनिधि सभाको बैठकले संविधान सभा अध्यक्ष, प्रतिनिधि सभाका पूर्वसभामुख तथा वर्तमान प्रतिनिधि सभा सदस्य सुवास नेम्वाङको निधनमा शोक प्रस्ताव पारित गरेको छ।

बिहीबार बसेको प्रतिनिधि सभा बैठकले नेकपा एमाले संसदीय दलका उपनेतासमेत रहेका नेम्वाङको निधनमा शोक प्रस्ताव पारित गरेको हो।

सभामुख देवराज घिमिरेले नेम्वाङको निधनमा शोक प्रस्ताव पारित गरिएको जानकारी गराएका छन्। ‘शोक प्रस्ताव सर्वसहमतिले पारित भएको घोषणा गर्दछु,’ उनले भने।

नेम्वाङको निधनमा सांसदहरूले एक मिनेट मौनधारणसमेत गरेका थिए। नेम्वाङको गत भदौ २६ गते हृदयघातका कारण निधन भएको थियो।

प्रतिनिधि सभाको अर्को बैठक शुक्रबार दिउँसो १ बजे बस्ने गरी स्थगित भएको छ।