काठमाडौँ। प्रतिनिधि सभामा गणपूरक संख्या नपुगेपछि विद्युत् विधेयक, २०८० पेस हुन सकेन।
मंगलबारको प्रतिनिधि सभा बैठकमा ऊर्जा, जलस्रोत तथा सिँचाइमन्त्री शक्तिबहादुर बस्नेतले विधेयक पेसको प्रस्ताव गरेका थिए।
तर, निर्णयार्थ प्रस्तुत गर्ने समयमा नेमकिपाका सांसद प्रेम सुवालले गणपूरक संख्याको प्रश्न उठाएपछि गणना गरिएको थियो। गणपूरक संख्या पुग्न ६९ हुनुपर्नेमा ६६ मात्रै सांसद उपस्थित भएपछि संसद्मा प्रस्ताव निर्णयार्थ पेस हुन सकेन।
त्यसअघि, सांसद सुवालले नै प्रस्ताव पेस गर्न अनुमति माग्ने प्रस्तावमाथि विरोधको सूचना दर्ता गराएका थिए। विरोधको सूचना बहुमतले अस्वीकृत गरेको थियो।
गणपूरक संख्या नपुगेपछि संसद्को बाँकी कार्यसूची अघि बढ्न सकेन। सभामुख देवराज घिमिरेले बैठक स्थगन गर्दै असोज १८ गते दिउँसो १ बजेका लागि अर्को बैठक बोलाएका छन्।
