रिगललाई दिइएको आममाफी विरुद्धको रिटमा आज सुनुवाइ

काठमाडौँ। संविधान दिवसको दिन जेलमुक्त भएका बाँकेका रिगल भनिने योगराज ढकालको आममाफीविरूद्वको रिटमा आज सुनुवाइ हुँदैछ।

सरकारको सिफारिसमा राष्ट्रपति रामचन्द्र पौडेलले रिगललाई आममाफी दिएका थिए। रिगलले २०७२ साल असार २९ गते नेपालगञ्जकै २९ वर्षीय चेतन मानन्धरको खुँडा प्रहार गरी हत्या गरेका थिए। अदालतले उनलाई सर्वस्वसहित जन्मकैद सुनाएको थियो।

सरकारको सिफारिसमा राष्ट्रपतिले रिगललाई आममाफी दिएपछि मृतक चेतनकी श्रीमती भारती मानन्धरले सर्वोच्च अदालतमा रिट दायर गरेकी थिइन्। उनले रिगलको आममाफी फिर्ता हुनुपर्ने माग राखेकी छन्। सोही रिटमा आज सुनुवाइ हुने भएको हो।