काठमाडौँ। मेडिकल व्यवसायी दुर्गा प्रसाईंले नेकपा एमालेका अध्यक्ष केपी शर्मा ओलीभन्दा नेकपा माओवादीका अध्यक्ष पुष्पकमल दाहाल प्रचण्ड र उपाध्यक्ष नारायणकाजी श्रेष्ठमा राजनीतिक चरित्र देखिएको बताएका छन्।
मंगलबार पत्रकार सम्मेलन गरेर प्रसाईंले देश बचाउनुपर्छ भन्दा आफूमाथि दुर्व्यवहार भएको भन्दै अब एमालेसँग खेल सुरु भएको बताएका हुन्।
उनले भने, ‘एमाले कसको पार्टी रहेछ भन्ने देखियो। तस्करहरूको पार्टी एमाले भन्ने प्रमाणित भयो। गरिबको आवाज उठाउँदा मलाई कालो मोसो दलियो। यसको जवाफ जनताले फर्काउँछन्।’
उनले एमाले आफूसँग डराएको भन्दै खेल सुरु भएको पनि बताए। ‘हिजोदेखि खेल सुरु भयो, एमालेले मसँग खेल सुरु गर्यो, मैले आजबाट पत्रकार सम्मेलन गरेर सुरु गरेँ’, प्रसाईंले भने, ‘खेल बन्द भएको छैन।’
