काठमाडौँ। परराष्ट्रमन्त्री एनपी साउद संयुक्त राष्ट्रसंघका महासचिव एन्टोनियो गुटरेजसाग भेट गरेर मात्र अमेरिका जाने भएका छन्।
उनी कात्तिक १२ मा मात्र अमेरिकाका लागि काठमाडौँबाट उड्ने गरी कार्यतालिका बनिरहेको परराष्ट्रमन्त्री साउदको सचिवालयले जनाएको छ। परराष्ट्रमन्त्री साउदले कात्तिक ७ देखि ९ सम्म अमेरिका भ्रमण गर्ने समाचारहरु सार्वजनिक भईरहँदा उनको सचिवालयले भने कात्तिक १२ मा मात्रै भ्रमण हुने बताएको हो।
कात्तिक ११ गते राती (१२ गते विहान) संयुक्त राष्ट्रसंघका महासचिव एन्टोनियो गुटरेज नेपाल भ्रमणमा आउँदैछन्। गुटरेजको गत असोज २६ र २७ मा नेपाल भ्रमण हुने बताइएको भएपनि अन्तिम समयमा इजरायल प्लोस्टाइन द्दन्द्दका कारण भ्रमण स्थगित भएको थियो। अब उनी कात्तिक ११ गते राती नेपाल आउन लागेका छन्।
‘परराष्ट्रमन्त्रीले संयुक्त राष्ट्र संघका महासचिवलाई काठमाडौँमा स्वागत गरेर भेटेपछि मात्र अमेरिका जाने तयारी गर्नुभएको छ,’ परराष्ट्रमन्त्रीको सचिवालयले भन्यो,–‘गुटरेज साग १२ कात्तिकमा उहाँले काठमाडौँमा भेटनुहुन्छ, त्यसपछि मात्र अमेरिका जानुहुन्छ।’
मन्त्री साउदलाई अमेरिकी सरकारले वासिङ्टन डीसीमा स्वागत गर्न तयार भएर बसेको छ। पछिल्लो समय अमेरिकाबाट नेपालमा लगातार भ्रमण भइरहँदा नेपालबाट भने भ्रमण हुन सकेको थिएन। अमेरिकी विदेश मन्त्रालय र नेपालको परराष्ट्र मन्त्रालय दुवैले सहकार्य गरी परारष्ट्रमन्त्री साउदको अमेरिका भ्रमण हुन लागेको हो।
मन्त्री साउद सन् २०१८ पछि अमेरिका भ्रमण गर्ने नेपालका उच्च पदाधिकारी हुनेछन्। सन् २०१८ मा केपी ओली सरकारका तत्कालीन परराष्ट्रमन्त्री प्रदीप ज्ञवालीले त्यस बेला डिसेम्बर १८ देखि २१ सम्म अमेरिकाको भ्रमण गरेका थिए । त्यस बेला उनले डोनाल्ड ट्रम्प प्रशासनका विदेशमन्त्री माइकल पम्पियोलाई भेटेका थिए। यस पटक साउदले जो बाइडेन प्रशासनका विदेशमन्त्री एन्टोनी ब्लिकेनसँग द्विपक्षीय भेटवार्ता गर्नेछन्।
