अफताब आलमविरुद्धको मुद्दामा बहस नोट पेस गर्न अदालतको आदेश

काठमाडौँ । जिल्ला अदालत गौरले रौतहटको राजपुर फरदहवामा १६ वर्षअघि भएको बम बिस्फोट घटनाका आरोपित कांग्रेस नेता मोहम्मद अफताब आलमविरुद्धको मुद्दामा बुधबार बहस नोट माग्ने आदेश गरेको छ ।

पटक–पटक पेसी सर्दै आएको मुद्दाको फैसला हुने अनुमान गरिए तापनि १५ दिनभित्र लिखित बहस नोट पेस गर्न आदेश जारी भएको हो ।

न्यायाधीश बाबुकाजी बानियाँको एकल इजलासले मुद्दाको गम्भीरता तथा जटिलतालाई विचार गर्दा जिल्ला सरकारी वकिल तथा प्रतिवादीहरूका कानुन व्यवसायीको तर्फबाट १५ दिन भित्र वहस नोट माग गरि पेश गर्न आदेश दिइएको हो ।

२७ चैत २०६४ मा रौतहटको राजपुरमा भएको बम विस्फोटमा परेर घाइते भएका त्रिलोकप्रताप सिंह, ओसी अख्तरलगायतलाई जिउँदै जलाएको आरोपमा पूर्वमन्त्री आलमलाई २०७६ असोजमा प्रहरीले पक्राउ गरेको थियो ।

आलम हाल ललितपुरको नख्खु कारागारमा छन् भने अर्का आरोपी आलमका भाइ महताब आलम गौर जेलमा छन् ।