काठमाडौँ। मेडिकल व्यवसायी दुर्गा प्रसाईंले आफूलाई नजरबन्दमा राखेको भन्दै सर्वोच्च अदालतमा दायर गरेको बन्दी प्रत्यक्षीकरणको रिट निवेदन फिर्ता लिएका छन्।
मंसिर ८ मा उनका तर्फबट वरिष्ठ अधिवक्ता सुरेन्द्र भण्डारीले प्रसाईंलाई सरकारले नजरबन्दमा राखेको भन्दै रिहा गर्न माग गरेर सर्वोच्च अदालतमा बन्दी प्रत्यक्षीकरणको रिट दर्ता गरेका थिए।
तर सोही दिन गृहमन्त्रीको सचिवालयले उनलाई नजरबन्द नगरिएको प्रष्टिीकरण दिएको थियो भने प्रसाईले घरभित्रै पत्रकार सम्मेलन गर्ने देखि ९ गते शनिबार काठमाडौँको सिफलमा आफैं पुगेर सम्वोधन समेत गरेका थिए।
त्यसपछि प्रसाईंका तर्फबाट बन्दी प्रत्यक्षीकरण रिट दर्ता गराएका वरिष्ठ अधिबक्ता भण्डारीले निवेदन फिर्ता लिएका हुन्।
‘सरकारले उहाँलाई छाडिसक्यो, त्यसो भएकाले अब बन्दीसम्बन्धी रिटको प्रयोजन समाप्त भएकाले आज निवेदन दिएर फिर्ता लिइसक्यौँ’, वरिष्ठ अधिवक्ता भण्डारीले भने।
