बलात्कार आरोपमा माओवादी नेता देवकोटा पक्राउ

काठमाडौँ। आफ्नै घरमा काम गर्ने किशोरी बलात्कारको आरोपमा माओवादी नेता भूमिनन्द देवकोटा पक्राउ परेका छन्। प्रहरीले काठमाडौँ बस्दै आएका गोरखाका ६५ वर्षीय देवकोटालाई पीडित किशोरीले दिएको जाहेरीका आधारमा गत साता पक्राउ गरेको हो।

पीडित भनिएकी १७ वर्षीया किशोरी देवकोटाकै घरमा बस्दै आएकी थिइन्। अनुसन्धानका क्रममा ६ वर्षको उमेरदेखि पीडित बालिकालाई देवकोटाले आफ्नो घरमा संरक्षण दिएर राखेको बताइएको छ। प्रहरीमा पीडित बालिकाले दिएको जाहेरीमा देवकोटाले विगत एक वर्षदेखि उनलाई जबरजस्ती करणी गरेको उल्लेख छ।

गोरखा स्थायी घर भएका देवकोटाको काठमाडौँस्थित घरबाट गत तिहारको समयमा पीडित किशोरी यौन अत्याचार सहन नसकेर निस्किएकी थिइन्। देवकोटाको घरबाट निस्किएपछि उनी एक युवकसँग बस्दै आएकी थिइन्। प्रहरीले प्रेमी भनिएका ती युवकलाई पनि पक्राउ गरेको छ। पक्राउ पर्नेमा पेप्सीकोला बस्ने २७ वर्षका दीपेश नेपाली रहेका छन्। नेपालीले पीडित भनिएकी किशोरीलाई कात्तिक ३० गते बलात्कार गरेको जाहेरीमा उल्लेख छ। हाल दुबै जनालाई हिरासतमा राखेर प्रहरीले अनुसन्धान गरिरहेको छ।

देवकोटा, हिसिला यमी मन्त्री हुँदाका पिए समेत हुन्। तर माओवादी विभाजनदेखि नै देवकोटा बाबुराम भट्टराई र हिसिला यमीसँग छुटिएका थिए।