१ करोड ५ लाख घुस लिएको आरोपमा कुश्माका प्रमुख प्रशासकीय अधिकृत पक्राउ

पोखरा । पर्वतको कुश्मा नगरपालिकाका प्रमुख प्रशासकीय अधिकृत उदयबहादुर पराजुली पक्राउ परेका छन् । जिल्ला प्रहरी पर्वतले उनलाई बुधबार दिउँसो १ बजे कार्यकक्षबाटै पक्राउ गरेको हो ।

सहकारी रजिष्ट्रारको कार्यालय पोखराका पूर्व रजिष्ट्रारसमेत रहेका पराजुलीले पोखरास्थित मित्रमिलन सहकारीको कार्यक्षेत्र विस्तार गर्न भन्दै सहकारीको एक करोड पाँच लाख रुपैयाँ घुस लिएको आरोप छ । पक्राउ परेका पराजुलीलाई पोखरा ल्याउने भएको छ ।

उनलाई जिल्ला प्रहरी कार्यालय कास्कीले जिल्ला अदालतबाट पक्राउका लागि अनुमति लिएको थियो । पराजुली सहसचिवको परीक्षा दिन जाने भन्दै पुस ३ गतेदेखि कार्यालयबाट बिदा लिएका थिए । त्यसपछि सम्पर्कविहीन भएका थिए ।