विराटनगरबाट अवैध सामान बरामद

विराटनगर। मोरङको विराटनगर महानगरपालिका– ५ बाट अवैध रजनीगन्धा र तुलसी सहित ३ जनालाई प्रहरीले पक्राउ गरेको छ।

शनिबार कोशी प्रदेश प्रहरी कार्यालय विराटनगरको प्रादेशिक अनुसन्धान समूहले विराटनगर– ५ चाँदनी चोकस्थित जय गणेश जनरल स्टोरमा भारतबाट अवैध रुपमा ८ हजार ६९४ पिस रजनीगन्धा र ७ हजार ३४४ पिस तुलसी ल्याइ स्टोर गरिरहेको अवस्थामा फेला पारेको हो। चोरी तस्करी कार्यमा संलग्न रहेका भोक्राहा नरसिंह गाउपालिका– ६ सुनसरीका २६ वर्षीय दिपक कुमार साह, २६ वर्षीय गुरुदेव साह र विराटनगर– ५ का ४२ वर्षीय अरुण यादव समेतलाई को. १३ प ५०८५ नम्बरको मोटरसाईकल सहित पक्राउ गरेको हो। अवैध रजनीगन्धा र तुलसी सहित पक्राउ परेका तीनै जनालाई आवश्यक कारवाहीको लागि जिल्ला प्रहरी कार्यालय मोरङमा बुझाइएको छ।

यसै गरी इलाका प्रहरी कार्यालय दुहबीबाट खटिएको गस्ती टोलीले दुहबी नगरपालिका– २ स्थितमा अवैध रुपमा भारत बाट भन्सार छली चोरी निकासी गरी नेपाल तर्फ ल्याउँदै गरेको करिव १ लाख ६ हजार मुल्य बरावरको १८० पिस कुर्ता सुरुवाल बरामद गरी आवश्यक कारवाहीको लागि सुनसरी भन्सार कार्यालयमा बुझाएको छ।