टोरेसको ह्याट्रिकमा बार्सिलोना विजयी, रियल मड्रिडको पनि जित

काठमाडौँ । स्पेनिस ला लिगा अन्तर्गत बार्सिलोनाले रियल बेटिसलाई पराजित गरेको छ । गएराती सम्पन्न खेलमा बार्सिलोनाले रियल बेटिसलाई ४–२ गोल अन्तरले पराजित गरेको हो ।

बार्सिलोनाको जितमा फेरान टोरेसले ह्याट्रिक गरेका थिए भने जोआओ फेलिक्सले एक गोल गरेका थिए । त्यस्तै रियल बेटिसका लागि इस्कोले दुवै गोल गरेका थिए ।

यो जितपछि बार्सिलोनाले २० खेलमा ४४ अंक हासिल गरेको छ भने २१ खेलबाट ३१ अंकसहित बेटिस लिगमा नवौं स्थानमा रहेको छ ।

त्यसअघि भएको खेलमा रियल मड्रिडले अल्मारियालाई ३–२ गोलले पराजित गरेको छ । रियलको लागि जुडे वेलिङहाम, भिनिसियस जुनियर र ड्यानी कार्भाहालले गोल गरे भने अल्मारियाको लागि लार्जी रामाजानी र एड्गर गोञ्जालेजले गोल गरे । रियलको २० खेलबाट ५१ अंक भएको छ भने, २१ खेल खेलेको अल्मारियलको ६ अंक छ ।