काठमाडौँ । कोशी प्रदेशका सत्तारुढ दलहरूका बिचमा मन्त्रालय बाँडफाँडका विषयमा कुरा मिलेको छ । सत्ता गठबन्धन भित्र मन्त्रिपरिषद् विस्तारका विषयलाई लिएर खटपट बढेपछि मुख्यमन्त्री केदार कार्कीले मन्त्रिपरिषद् विस्तारको तयारी गरेका छन् ।
आज नै मन्त्रिपरिषद्को विस्तारको तयारी भए पनि नेपाली काङ्ग्रेसका नेता तथा पूर्व मन्त्री केशव कुमार बुढाथोकीको मृत्यु भएका कारण आजलाई मन्त्री परिषद् विस्तार रोकिएको मुख्यमन्त्री कार्की निकट स्रोतले जानकारी दियो ।
मुख्यमन्त्री कार्यालय स्रोतका अनुसार माओवादीलाई २ वटा र काङ्ग्रेसले २ वटा मन्त्रालय पाउने गरि सहमति भएको थियो । यस अघि माओवादीलाई एउटा मात्रै मन्त्रालय दिने अडानमा रहेका मुख्यमन्त्री कार्की राष्ट्रियसभाको चुनावमा माओवादीका उम्मेदवार पराजित भएपछि २ वटा मन्त्रालय दिने अवस्थामा पुगेका हुन् ।
अब विस्तार हुने मन्त्रिपरिषद्मा काङ्ग्रेसबाट ओखलढुङ्गाका प्रदीप सुनुवार र उदयपुरका रामकुमार खत्री मन्त्री बन्ने भएका छन् । सुनुवार शेरबहादुर देउवा समूह र खत्री शेखर कोइराला समूहका हुन् ।
यस्तै माओवादीबाट सङ्खुवासभाका राजेन्द्र कार्की र उदयपुरका नारायण बुर्जा मगर मन्त्री बन्ने भएका छन् । कार्की यसअघि उद्धव थापा नेतृत्वको सरकारमा विना विभागीय मन्त्री थिए ।
गत असोज २७ गते नेकपा एमालेको सहयोगमा मुख्यमन्त्री बनेका कार्कीले यसअघि तीन जनालाई मात्रै मन्त्री बनाएका थिए । उनले बाँकी मन्त्रालय आफैसँग राखेका थिए ।
कार्कीले यसअघि नेपाली काँग्रेस, माओवादी र नेकपा एकीकृत समाजवादी पार्टीबाट एक एक जनालाई मन्त्री बनाएका थिए ।
अहिले कोशी प्रदेशमा काँग्रेसका शमशेर राई, आन्तरिक मामिला तथा कानु नमन्त्री, माओवादीका गणेश उप्रेती पर्यटन, वन तथा वातावरण मन्त्री र नेकपा एका कमल जबेगु भौतिक पूर्वाधार मन्त्री बनाएका थिए ।
