काठमाडौँ । प्रधानमन्त्री पुष्पकमल दाहालले आगामी आर्थिक वर्षको नीति, कार्यक्रम र बजेटमा मधेशका लागि विशेष व्यवस्था गर्ने बताएका छन् ।
शनिबार धनुषा जिल्ला सबैला नगरपालिका वडा नम्बर ४ र सिरहा जिल्ला कल्याणपुर नगरपालिका वडा नम्बर ५ जोडने कमला नदी पुल निर्माण कार्यको शिलान्यास गर्दै उनले सो कुरा बताएका हुन् ।
प्रधानमन्त्री दाहालले मधेशमा विकास, निर्माणको काममा गति ल्याउन आफैँ सो पुलको शिलान्यास कार्यक्रममा उपस्थित भएको पनि बताए । मधेश र मधेशी जनताको समृद्धि नभई मुलुकको समृद्धि नहुने उल्लेख गर्दै प्रधानमन्त्री दाहालले त्यसका लागि आफूले सक्दो सहयोग गर्ने आश्वासन समेत दिए ।
त्यस अवसरमा उनले मधेशबाट चुनाव लडेर दोस्रो पटक प्रधानमन्त्री भई आफूले संघीय लोकतान्त्रिक गणतन्त्र नेपालको संविधान कार्यान्वयन गर्ने अवसर प्राप्त गरेकोमा गर्व लाग्ने गरेको पनि बताए । प्रधानमन्त्री दाहालले मधेबमा कृषि क्षेत्रको विकासका लागि आवश्यक सिंचाई, बीउबिजन, मल आदिको आवश्यक व्यवस्था गर्न सरकार प्रतिवद्ध रहेको बताए ।
प्रधानमन्त्री दाहालले सो पुलको निर्माण कार्यमा ढिलाई नगर्न पनि ठेकेदार कम्पनीलाई निर्देशन दिए । सो पुलको निर्माण कार्यमा निगरानी राख्न पनि उनले स्थानीय सरकारलाई समेत आग्रह गरेका थिए ।
