बारामा भएको ग्यास सिलिन्डर बिस्फोटमा एक जनाको मृत्यु, ४ जना घाइते

काठमाडौँ । बारामा भएको ग्यास सिलिन्डर बिस्फोटमा एक जनाको मृत्यु भएको छ । निजगढ नगरपालिकामा सोमबार दिउँसो भएको ग्यास सिलिन्डर बिस्फोटमा परी घाइते भएकामध्ये एक जनाको मृत्यु भएको हो ।

घाइते भएकामध्ये निजगढ नगरपालिका– ५ का ४५ वर्षीय रेशम मगरको मृत्यु भएको बाराका प्रहरी प्रवक्ता दधिराम न्यौपानले जानकारी दिए । थप उपचारको लागि वीरगञ्ज ल्याउने क्रममा मगरको मृत्यु भएको उनले बताए । न्यौपानेका अनुसार उनी रोहित वर्कसपका सञ्चालक हुन् ।

बिस्फोटमा परि घाइते हुनेहरुमा नगरपालिका–५ बस्ने ४५ वर्षीय सूर्यबहादुर थापा, पर्साको वीरगञ्ज महानगरपालिका–९ बस्ने ३४ वर्षीय फिरोद देवान, भारतको गवाईका ३५ वर्षीय राकेश जयसवाल र भारतको रामगढवाका २० वर्षीय अरविन साह रहेको उनले बताए ।

घाइतेमध्ये थापाको सामुदायिक प्रसुति गृह अस्पताल निजगढमा उपचार भइरहेको र अन्यको वीरगञ्जस्थित नारायणी बयोद्धा अस्पतालमा उपचार भइरहेको न्यौपानेले बताए ।