काठमाडौँ । भक्तपुरको चाँगुनारायण नगरपालिका २ दुवाकोटस्थित एक प्लाई कार्पेट कारखानामा आगलागी हुँदा करिब २ करोडको क्षति भएको छ । आगलागीमा परेर दुईजना घाइते भएका छन् । एक जनाको अवस्था गम्भीर रहेको छ ।
शनिबार राति सन्तोषमान श्रेष्ठको ज्योति प्लाई कार्पेट कारखानामा आगलागी भएको हो । आगलागीको जानकारी पाउनासाथ पुगेको भक्तपुर, काठमाडौँ, ललितपुर र काभ्रेका ७ वटा दमकलले आगो निभाएका थिए । नेपाल प्रहरी र सशस्त्र प्रहरीको परिचालित टोली र स्थानीयको प्रयासपछि बिहान ४ बजे आगो नियन्त्रणमा लिइएको भक्तपुर प्रहरीले जनाएको छ ।
आगलागीबाट रामेछापको लिखु तामाकोशी गाउँपालिका–६ घर भई हाल भक्तपुरको दुवाकोट बस्ने २३ वर्षीय बुद्धनारायण श्रेष्ठ सामान्य घाइते भएका छन् भने भारत घर भएका उद्योगमा काम गर्ने २९ वर्षका मनु उर्वा गम्भीर घाइते भएको जिल्ला प्रहरी परिसर भक्तपुरले जनाएको छ । उनलाई सुरुमा उपचारार्थ भक्तपुरको डा इवामुरा अस्पताल लगिएको थियो भने पछि थप उपचारका लागि कीर्तिपुर अस्पताल लगिएको प्रहरीले जनाएको छ ।
आगलागीको कारण खुल्न नसकेको प्रहरीको भनाइ छ । झण्डै २ करोड रुपैयाँ बराबरको क्षति भएको प्रहरीको प्रारम्भिक अनुमान छ ।
