कोकिनसहित काठमाडौँबाट एक विदेशी महिला पक्राउ

काठमाडौँ । प्रहरीले लागूऔषध कोकिनसहित काठमाडौँ बाट एक जना विदेशी महिलालाई पक्राउ गरेको छ । पक्राउ पर्नेमा मलेसियाको जोहोर बस्ने ४७ वर्षीया बथुमलाई भदिभालो रहेकी जिल्ला प्रहरी परिसर काठमाडौँका प्रहरी उपरीक्षक नवराज अधिकारीले जानकारी दिए ।

परिसरको विशेष टोली र प्रहरी वृत्त लैनचौरको संयुक्त टोलीले काठमाडौँ महानगरपालिका वडा नम्बर २९ को ठमेलको काठमाडौँ सिटी होटलबाट उनलाई पक्राउ गरेको हो ।

उनको साथबाट ५ किलोग्राम ८ सय २० ग्राम कोकिन बरामद भएको र यसको बजार मूल्य २० करोड ३७ लाख रुपैयाँ बराबर रहेको प्रहरीले जनाएको छ । ती महिलाले ६ वटा स्कुल ब्यागमा फल्स बटम बनाएर कोकिन राखेकी थिइन् ।