काठमाडौँ । बारामा माछा खाएर बिरामी भएका एकै परिवारका तीनजना बालबालिकाको मृत्यु भएको छ ।
सिम्रौनगढ नगरपालिका– ७ झवानीटोलका नरेश रामका तीनजना छोराछोरीको मृत्यु भएको हो । उनका ९ वर्षीया छोरी लालिमा, ७ वर्षीया पुष्पा र ५ वर्षीय छोरा कृष्णनन्दन रामको सोमबार मृत्यु भएको जिल्ला प्रहरी कार्यालय बाराका प्रवक्ता डिएसपी प्रकाश सापकोटाले जानकारी दिए ।
शनिबार बेलुकी माछा र भात खाएर सुतेका उनीहरु विरामी परेका थिए,उपचारका क्रममा सोमबार तीनै जनाको मृत्यु भएकोहो ।
प्रहरीका अनुसार शनिबार बेलुकी गाउँकै पोखरीमा माछा मारेर स्थानीय व्यापारीले गाउँलेलाई बेचेका थिए। गाउँको पश्चिमतर्फ रहेको पोखरीबाट व्यापारीले मारेर ल्याएका माछा ४०–५० घरपरिवारले किनेका थिए । तीमध्ये माछा र भात खाएर सुतेका नरेशका तीनजना छोराछोरीलाई राति नै पेट दुख्ने, बान्ता हुने र झाडापखाला लाग्ने समस्या भएर सिकिस्त बिरामी परेको प्रहरीलाई परिवारजनले बताएका छन् ।
सिम्रौनगढ स्वास्थ्य क्लिनिकमा उपचारको लागि भर्ना गरिएका उनीहरुरूलाई त्यहाँबाट थप उपचारका लागि प्रादेशिक अस्पताल कलैया लगिएको थियो । कलैयाबाट चिकित्सकले थप उपचारका लागि वीरगञ्जस्थित नेशनल मेडिकल कलेज अस्पतालमा रिफर गरेका थिए ।
तीनै जनालाई कलैयाबाट वीरगञ्ज लाँदै गर्दा लालिमाको बाटोमै मृत्यु भयो। दुई जना बालकको उपचारको क्रममा मृत्यु भएको हो । तीनै जनाको शव सोमबार कलैया अस्पतालमा पोस्टमर्टम गरी सदगद् गरिएको प्रहरील् जनाएको छ । गाउँले एवं परिवारजनले माछा विषाक्त भएका कारण उनीहरू बिरामी परेको आशंका गरेका छन्।
तर त्यही माछा–भात खाएका मृतकका आमा, बाजे, बज्यै र अन्य गाउँलेलाई केही भएको छैन । यसबारे प्रहरीले अनुसन्धान गरिरहेको छ । मृतकका परिवार विपन्न छ। मृतक बालबालिकाका बुवा नरेश मजदुरीको सिलसिलामा भारतको दिल्लीमा छन् ।
