काठमाडौँ । ब्रिटिस एजुकेशन ग्रुप अन्तर्गतको द ब्रिटिस कलेजले नेपालमा पहिलो पटक ‘ग्रिनिङ एजुकेशन पार्टनर’ (हरित शिक्षा साझेदार)को मान्यता प्राप्त गरेको छ । ब्रिटिस कलेजले प्रदान गर्दै आएको बीबीए शैक्षिक कार्यक्रम अन्तर्गत इनोभेट फर इम्प्याक्ट (आईएफआइ) परियोजनामा गरेको उत्कृष्ट कार्यको परिणामस्वरुप कलेजले संयुक्त राष्ट्र शैक्षिक, वैज्ञानिक र सांस्कृतिक संगठन (युनेस्को)बाट यो मान्यता पाएको हो ।
ब्रिटिस कलेजको आईएफआई परियोजना हरित शिक्षा र दिगोपनप्रति लक्षित छ । युनेस्कोको बिभिन्न उच्च मापदण्डहरु पूरा गरेकै कारणले गर्दा कलेजले ऐतिहासिक उपलब्धि हासिल गरेको हो । यससँगै कलेज युनेस्कोबाट सम्मान प्राप्त गर्ने नेपालको एकमात्र शैक्षिक संस्था बनेको छ ।
यस मान्यतासँगै ब्रिटिस कलेजले युनेस्कोको बिभिन्न स्रोतहरु जस्तै, ज्ञान प्राप्त गर्ने, बिभिन्न कार्यक्रमहरुमा सहभागिता, परामर्श लगायतका अवसरहरुमा पहुँच प्राप्त गरेको छ । त्यसैगरि अब कलेजलाई आफ्नो नेटवर्क विस्तार गर्न र संयुक्त राष्ट्र संघको अन्य एजेन्सीहरुसँग सम्बन्ध निर्माण गर्ने ढोका खुलेको छ ।
कलेजको उपलब्धिपछि प्रक्रिया दिँदै बीबीए तथा आईएफआई परियोजनाका प्रमुख सुनिता बस्नेतले भन्नुभयो, ‘ हाम्रो संस्थामा सस्टेनेबिलिटी र ग्रिन एजुकेशनबारे साझा दृष्टिकोण रहेको छ । त्यसैले यो उपलब्धि प्राप्त गर्नमा ब्रिटिस कलेजका सबै विभागका सहकर्मीहरुको भूमिका महत्वपूर्ण रहेको छ । हामी यस महत्वपूर्ण उपलब्धिमा कृतज्ञ छौं । साथै, आगामी दिनमा पनि यस्तो कार्यलाई बढावा दिन हाम्रो कलेज सक्षम रहेको छ ।’
ग्रिनिङ एजुकेशन पार्टनरको रुपमा मान्यता पाएकोमा ब्रिटिस कलेज गर्व गर्दै शिक्षा तथा अन्य संस्थाहरुलाई पनि यस्ता कार्यको लागि प्रेरित गर्दछ ।
