काठमाडौँ । रामेछापमा पहिरोमा परेर दुई जनाको मृत्यु भएको छ । पहिरोमा आठ जना बेपत्ता भएका छन् ।
रामेछापको दोरम्बा सैलुङ गाउँपालिका–३ टोकरपुरस्थित लेकखर्कमा पहिरोले बस्ती बगाउँदा दुई जनाको मृत्यु भएको छ भने आठ जना बेपत्ता भएका छन् । एक जनालाई घाइते अवस्थामा उद्धार गरिएको छ ।
गएराति अविरल वर्षाका कारण गाउँमाथिबाट पहिरो खस्दा लेकखर्कका ४ घर बगाएको हो । पहिरोमा हराएका ११ जनामध्ये दुई जनाको शव भेटिएको । एक जनालाई घाइते अवस्थामा उद्धार गरिएको छ भने ८ जना अझै बेपत्ता छन् । बेपत्ताहरुको खोजी कार्य भइरहेको दोरम्बा सैलुङ गाउँपालिका–३ का वडा सदस्य तुल प्रसाद कँडेलले जानकारी दिए ।
पहिरोमा परेर ३२ वर्षीया चण्डिका थापा मगर र उनका अन्दाजी दुई वर्षका छोरा आमुस मगरको मृत्यु भएको छ भने चण्डिकासँगै त्यस घरमा रहेकी अञ्जना पहरीको जीवितै उद्धार गरिएको हो ।
यस्तै पहिरोमा बेपत्ता हुनेमा ९० वर्षीया पुड्की पहरी, ४५ वर्षीया उर्मिला पहरी, १५ वर्षीय सन्तोष पहरी, १६ वर्षीय विज्ञान पहरी, १५ वर्षीय सन्दीप पहरी, करिब ५५ वर्षका काले पहरी, ५० वर्षीया झ्याउँकिरी पहरी र २० वर्षीया विनीता पहरी पनि बेपत्ता भएका छन् ।
यस्तै पहिरोमा पुरिएर गोमा पहरीको घरमा रहेका ३ वटा भैँसी र १० वटा बाख्रा, उर्मिला पहरीको एउटा भैँसी, तीनवटा गाई र १८ वटा बाख्रा तथा कर्णबहादुर पहरीको एउटा बाख्रा पनि बेपत्ता भएका छन् ।
पहिरोले चारवटा घर बगाएको छ भने पुरै बस्ती जोखिममा परेको छ । यस्तै अविरल वर्षाका कारण आएको बाढीले दोरम्बा सैलुङ गाउँपालिकाको तीन वटा पक्की पुल बगाएको स्थानीयले बताएका छन् ।
