त्रिवि अन्तर्गतका क्याम्पसहरू मर्ज हुने चाहेमा निवेदन दिन सकिने

काठमाडौँ। त्रिभुवन विश्वविद्यालयअन्तर्गतका सम्बन्धन प्राप्त दुई वा दुईभन्दा बढी क्याम्पसहरूले मर्ज हुने चाहेमा निवेदन दिन सक्ने भएका छन्। त्रिविले एक विज्ञप्ती जारी गर्दै सम्बन्धन प्राप्त दुई वा दुईभन्दा बढी क्याम्पसहरू मर्ज हुन सक्ने सूचनामाफर्त जानकारी दिएको हो।

‘नवीकरण अद्यावधिक भएका त्रिविबाट सम्बन्धन प्रदत्त दुई वा दुईभन्दा बढी क्याम्पसहरू पूर्णरूपले एक आपसमा गाभिई समायोजन हुन चाहेमा ती क्याम्पसहरूले आफ्नो क्याम्पस सभा वा सञ्चालक समितिबाट समायोजन हुने निर्णय गराइ २०८० आषाढ मसान्तसम्म योजना निर्देशनालयमा निवेदन पेस गर्न सम्बन्धित सबै इच्छुक क्याम्पसहरूलाई सूचित गरिन्छ,’ त्रिविले जारी सूचनामा उल्लेख छ।

समायोजन बापत कुनै शुल्क नलाग्ने बताइएको छ। क्याम्पसको बेग्लाबेग्लै निवेदन, मर्ज गर्नुपर्ने औचित्य खुलेको र समाहित हुने क्याम्पस खारेज गर्ने समितिको निर्णय, सम्बन्धन पत्रहरू, नवीकरण पत्रहरू र अक्षयकोषको रसिद आदि कागजात निवेदनसाथ सलग्न गर्नुपर्ने त्रिविले बताएको छ।