काठमाडाैँ । खानेपानीमन्त्री प्रदीप यादवले मेलम्ची खानेपानीको अवरोध खुलाउन मेलम्चीका स्थानीय बासिन्दाको घरमा नै पुगेर अनुरोध गर्ने बताएका छन् ।
दक्षिणकालीका नागरिकलाई आफूले घरमा नै पुगेर बिन्ति बिसाएपछि ललितपुरको नख्खु क्षेत्रमा सहज रूपमा खानेपानी ल्याएको भन्दै मन्त्री यादवले मेलम्चीमा पनि स्थानीयवासीकाे घरमा नै पुगेर अवरोध हटाउन आग्रह गर्ने बताएका छन् । उनले मेलम्चीका स्थानीयवासीले चार वटा मागसहित अवरोध गरिरहेको भन्दै सरकारले वार्ताको माध्यमबाट समाधान गर्ने बताए ।
मेलम्चीवासीको मागमा सहमति नजिक पुगेको मन्त्री यादवले दाबी गर्नुभएको छ । देशमा असहज परिस्थिति रहेको भन्दै उनले अहिलेलाई परिस्थिति बुझ्न मेलम्चीवासीसँग आग्रह गरे । उनले अहिले आन्दोलन गर्ने बेला नभई एकअर्कालाई सहयोग गर्ने समय रहेको बताए ।
खानेपानीमन्त्री यादवले बाढी पहिरोले खानेपानीमा मात्रै साढे ३ अर्ब रुपैयाँको क्षति पुर्याएको बताए । काठमाडाैँमा करोडौंका मेशिन डुबेको र बगाएको अवस्थामा रहेको भन्दै उनले सरकारले तत्कालका लागि काठमाण्डाै उपत्यका खानेपानी लिमिटेडमार्फत चल्ने मेशिन मर्मत गर्ने, नयाँ मेशिन खरिद गरी काम गर्ने बताए ।
