मन्त्री हेरफेरको कुरा हल्ला मात्रै हो: गृहमन्त्री लेखक

धनगढी। गृहमन्त्री रमेश लेखकले मन्त्री परिबर्तन हुने कुरा हल्ला मात्र रहेको बताएका छन्। बिहीबार नेपाल प्रेस युनियन कैलालीले कैलालीको धनगढीमा आयोजना गरेको पत्रकार भेटघाटमा मन्त्री हेरफेरको चर्चाबारे गरिएको प्रश्नमा उनले यस्तो बताएका हुन्। उनले आजका मितिसम्म मन्त्री हेरफेर हुने कुरामा कुनै छलफल नभएको बताए।

गृहमन्त्री लेखकले मन्त्री हेरफेरको विषय मन्त्रिपरिषद्मा अहिलेसम्म नउठेको बताए। ‘मन्त्री फेर्ने अधिकार प्रधानमन्त्रीमा निहीत भएपनि आजको समयसम्म त्यसबारे कुनै कुरा उठेको छैन,’ उनले भने।

सरकार र मन्त्रालयले गरेका कामको परिणाम बिस्तारै देखिन थालेकाले अहिले नै कुनै पनि मन्त्री फेरिने सम्भावना नरहेको लेखकको भनाइ छ। उनकै गृहमन्त्री पद जाँदैछ भन्ने हल्लाप्रति संकेत गर्दै लेखकले यस्तो स्पष्टीकरण दिएका हुन्।

अर्को प्रशंगमा उनले प्रधानमन्त्री केपी शर्मा ओलीको आसन्न चीन भ्रमणलाई लिएर सत्ता गठबन्धनमा कुनै समस्या नरहेको स्पष्ट पारे।