काठमाडौं । मार्गशीर्ष कृष्ण त्रयोदशीका दिन आज पशुपतिनाथमा पितृका नाममा बत्ती बालिदैछ ।
श्रद्धालुले पशुपतिनाथ वरपरका भागमा पितृका नाममा बत्ती बालेर रातभर जाग्राम बस्ने गर्छन् । भोलि पल्ट चतुर्दशी बिहान बागमतीमा सेलाएर स्नान गरी पाशुपत क्षेत्रमा शतबीज छर्ने परम्परा छ । यसरी बत्ती बालेर रातभर जाग्राम बसी शतबीज छर्दा पितृले सद्गति पाउने विश्वास छ ।
मातापिता दिवंगत भएको एक वर्ष नपुगेका सहित वर्षदिन पुगिसकेकाले बत्ती बाल्ने शतबीज रोपण गर्ने गर्छन् । तर, माता, पिता दिवङ्गत भई एक वर्ष पूरा नभएकाले भने शास्त्रीय रूपमा दीपदान एवं शतबीज रोपण गर्नु नहुने धर्मशास्त्रविद् बताउछन ।
सामान्यतय लगातार तीन वर्ष बत्ती बालेर शतबीजरोपण गर्ने चलन छ । पहिलो वर्ष दियोमा, दोस्रो वर्ष मानामा बत्ती बाल्ने र तेस्रो वर्ष महादीप बालेर समापन गर्ने चलन चलेको देखिन्छ । यो वर्ष आज बत्ती बाल्नुपर्ने र शनिबार बिहान शतबीज छर्नुपर्ने पञ्चांगमा उल्लेख छ ।
पञ्चाङ्गका अनुसार ४ घडी ५ पला अर्थात् ८ बजेर १५ मिनेट सम्म मात्र त्रयोदशी तिथि छ । त्यसपछि चतुर्दशी लाग्छ ।
