न्युयोर्क । गिरिजाप्रसाद कोइराला फाउन्डेसन अमेरिकाले ४८औँपटक निःशुल्क खाद्यान्न वितरण गरेको छ । न्युयोर्कको उडसाइडस्थित आफ्नै कार्यालय परिसरबाट फाउन्डेसनले निःशुल्क खाद्यान्न वितरण गरेको हो ।
न्युयोर्कस्थित प्रसाउद कम्युनिटी ऐफियर्स पेन्ट्रीसँगको सहकार्यमा आउँदै गरेको क्रिसमसका अवसरमा २८० जनालाई निःशुल्क सुक्खा खाना, फलफूलसहित तरकारी बाँडिएको फाउन्डेसनले जनाएको छ ।
फाउन्डेसनका अनुसार, त्यसबाट विभिन्न समुदाय, क्रमशः नेपाली, बंगाली, स्पेनिस, तिब्बेतियन, भारतीय, पाकिस्तानी समुदायका मानिस लाभान्वित भएका थिए । कोरोना कहरदेखि फाउन्डेसनले निःशुल्क खाद्यान्न वितरण गर्दै आएको छ ।
फाउन्डेसनले अमेरिकामा सामाजिक कार्य गर्दै आएको छ । “सामाजिक उत्तरदायित्वअन्तर्गत हामीले निःशुल्क खाद्यान्न वितरण गरेका हौँ,” गिरिजाप्रसाद कोइराला फाउन्डेसन अमेरिकाका अध्यक्ष सोमनाथ घिमिरेले भने, “फाउन्डेसनमार्फत सामाजिक कामहरूमा हामीले तीव्रता दिँदै आइरहेका छौँ ।”
