गोरखामा बस दुर्घटना हुँदा १२ जना घाइते

गोरखा। गोरखामा बस दुर्घटना हुँदा १२ जना घाइते भएका छन्। गोरखा नगरपालिका– ८ ढुङ्गागाढेमा बस दुर्घटना हुँदा १२ जना घाइते भएका हुन्।

चितवनको नारायणगढबाट गोरखाको आरुघाटका लागि छुटेको ना ५ ख ७२११ नम्बरको बस आज बिहान ११ बजेतिर ढुङ्गागाढेमा दुर्घटना भएको हो। दुर्घटनामा घाइते भएकामध्ये दुईजनाको अवस्था गम्भीर रहेको छ।

गम्भीर घाइते भएका गोरखा नगरपालिका– १४ का २७ वर्षका कमल पन्त र आरुघाट गाउँपालिकाका ५५ वर्षका खड्गबहादुर घलेलाई चितवको भरतपुर मेडिकल कजेलमा रेफर गरिएको गोरखा अस्पतालले जनाएको छ।

त्यस्तै, अन्य घाइतेको भने गोरखा अस्पतालमा उपचार भइरहेको छ।