काठमाडौं । नेकपा एमालेको साधारण सदस्य समेत नरहने गरि पार्टीबाट कारबाहीमा परेका नेता भीम रावलले बुधबार राजधानीमा पत्रकार सम्मेलन गरेर अध्यक्ष केपी शर्मा ओलीमाथि प्रश्न र आरोपको वर्षा लगाएका थिए । साथै उनले ‘मातृभूमि जागरण अभियान’ चलाउने जानकारी दिएका थिए ।
बिहीबार बसेको एमाले सचिवालय बैठकले अध्यक्ष ओलीमाथि रावलले लगाएको आरोप अपेक्षित नै नभएको खण्डन गर्दै त्यसको प्रतिवाद गरेको छ । सचिवालय बैठकपछि उपमहासचिव प्रदीप ज्ञवालीले ओलीबारे रावलको आरोप नेकपा माओवादी केन्द्रका अध्यक्ष पुष्प कमल दाहाल प्रचण्डले २०७७ सालमा लगाएको भन्दा भिन्न नरहेको दाबी गरेका हुन् ।
‘हामीले धेरै छलफल गरेनौँ । किनभने त्यो नौलो कुरा भएन । २०७७ साल कात्तिकमा यिनै भाषामा प्रचण्डले अध्यक्ष केपी ओलीलाई यस्तै खालका टिप्पणी गर्नुभएको थियो’, ज्ञवालीले भने, ‘एक किसिमले कपिपेस्ट जस्तै हो नयाँ कुरा छैन ।’
साथै आरोप लगाएबाटै रावलमा कति धेरै नकारात्मकता भरिएको रहेछ भन्ने पुष्टि भएको ज्ञवालीको भनाइ छ ।
‘एकजनमा बाबुराम, प्रचण्डहरू पुराना पार्टीलाई डिक्सनेरीमा भएका सबै शब्द प्रयोग गर्नुहुन्थ्यो, पछि रविजीहरू पनि त्यसैगरी उदाउनुभयो । गालिगलोजले देश बन्दैन’, ज्ञवालीले भन्छन्, ‘३१ पेजमा साढे ३० पेज गालिगलोज र आधा पेज अभियान चलाउने कुरा गर्नुभएपछि छलफल गर्नुपर्ने विषय हामीलाई लागेन ।’
