काठमाडाैँ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले मनसुनको पूर्वतयारी तथा प्रतिकार्य राष्ट्रिय कार्ययोजना, २०८२ निर्माण गर्दैछ ।
मौसम विज्ञान विभागको पूर्वानुमानका आधारमा मनसुनको पूर्वतयारी तथा प्रतिकार्यका लागि राष्ट्रिय कार्ययोजना निर्माण गर्न लागिएको प्राधिकरणले जनाएको छ ।
प्राधिकरणका प्रवक्ता उपसचिव रामबहादुर केसीले मनसुन भित्रिने समयअवधि नजिकसँगै पूर्वतयारी तथा प्रतिकार्य राष्ट्रिय कार्ययोजना निर्माणलाई तीव्रता दिइएको जानकारी दिए ।
मस्यौदा बनाएर विगतको तुलना गर्दै आउँदा दिनमा हुनसक्ने जोखिमलाई समेत आँकलन गरेर कार्ययोजना निर्माण भइरहेको उनको भनाइ छ ।
गृहमन्त्री रमेश लेखकले हालै यसवर्षको मनसुन पूर्वतयारी तथा प्रतिकार्यका लागि कार्ययोजना बनाउन प्राधिकरणलाई निर्देशन दिएका थिए ।
कार्ययोजनामा तोकिएका निकायगत जिम्मेवारीसहित पूर्वतयारीलाई तीव्रता दिन प्राधिकरण तथा सरोकारवाला सबै निकायलाई आवश्यक तयारी गर्नसमेत बैठकले निर्देशन दिएको थियो ।
