एजेन्सी । संयुक्त राष्ट्रसङ्घीय स्वास्थ्य एजेन्सी विश्व स्वास्थ्य सङ्गठन (डब्लुएचओ) ले कोभिड नाइन्टिन सङ्कटबाट उत्पन्न भएको तीन वर्षभन्दा बढीको वार्तापछि भविष्यको स्वास्थ्य सङ्कटसँग जुध्न एउटा ऐतिहासिक महामारी सम्झौता स्वीकृत गरेको छ ।
यो सम्झौताको उद्देश्य भविष्यका कुनै पनि महामारीमा विश्वव्यापी समन्वय र निगरानी तथा खोपहरूको पहुँच सुधार गरेर कोभिड महामारीको वरिपरि रहेको अव्यवस्थित प्रतिक्रिया र अन्तर्राष्ट्रिय अव्यवस्थालाई रोक्नु रहेको छ ।
अन्तर्राष्ट्रिय सञ्चार माध्यमका अनुसार डब्लुएचओ को निर्णय गर्ने वार्षिक सभाले मंगलबार जेनेभाको मुख्यालयमा योजना स्वीकृत गरेको हो । डब्लुएचओ प्रमुख टेड्रोस अधोनम घ्रेबिसियसको निर्णयलाई ऐतिहासिक भनेका छन । सम्झौता स्वास्थ्य, विज्ञान र बहुपक्षीय कार्यका लागि एक विजय भएको उनको भनाइ छ ।
निर्णयले सामूहिक रूपमा भविष्यका महामारी खतराहरूबाट विश्वलाई अझ राम्रोसँग सुरक्षित गर्न निश्चित गर्ने उनको विश्वास छ । धेरै चरणको तनावपूर्ण वार्तापछि गत महिना भएको सहमतिमा सम्झौताको पाठलाई अन्तिम रूप दिइएको थियो ।
अमेरिकी राष्ट्रपति डोनाल्ड ट्रम्पले डब्लुएचओबाट आफ्नो देशलाई फिर्ता लिने निर्णय गरेपछि अमेरिका वार्ताहरूबाट बाहिरिएको छ । सम्झौताको उद्देश्य अधिक अन्तर्राष्ट्रिय समन्वय र निगरानी तथा खोप र उपचारहरूमा अधिक न्यायसङ्गत पहुँचमा ध्यान केन्द्रित गरेर महामारीहरू राम्रोसँग पत्ता लगाउन र लड्न सुधार गर्नु भएको जनाइएको छ ।
