पाथीभरा मन्दिरमा भक्तजनले चढाएको सिक्काहरुको गणना शुुरु

ताप्लेजुङ । ताप्लेजुङको धार्मिक तथा पर्यटकीय क्षेत्र पाथीभरा देवी मन्दिरमा भक्तजनहरुले चढाएका सिक्काहरुको गणना कार्य शुुरु गरिएको छ ।

भक्तजनले भेटीस्वरूप चढाएका ती सिक्का पाथीभरा क्षेत्र विकास समितिको कार्यालय फुङ्लिङमा ल्याएर व्यवस्थापन गरिने गरिएको छ । समितिका कर्मचारीहरुले हरेक दिन मन्दिर परिसरबाट भेटीस्वरूप चढाइएका सिक्काहरु संकलन गर्ने गर्छन् ।

संकलन गरिएका ती सिक्कालाई पहिलो चरणमा मिक्सर प्रयोग गरेर सफा गरिन्छ, जसमा एकपटकमा ५० केजीसम्म सिक्का सफा गर्न सकिन्छ । माटो, धुलो तथा रंग हटाउने कार्यपछि ती सिक्कालाई घाममा सुकाइन्छ । सुकाइएका सिक्कालाई पुनः छुट्याउने कार्य गरिन्छ र त्यसपछि एक–एक हजार रुपैयाँको दरले प्याकेटमा राखिन्छ । सो प्रक्रिया पूरा गरेपछि गणना गरिएको रकम बैंकमा जम्मा गरिने समितिले जनाएको छ ।

धार्मिक आस्थासँग जोडिएको पाथीभरा मन्दिरमा देश विदेशबाट आउने भक्तजनको आगमन वर्षेनि बढ्दै गएको छ । भक्तजनको श्रद्धाको प्रतीकस्वरूप संकलित सिक्काको व्यवस्थित व्यवस्थापन र पारदर्शिता कायम गर्न समितिले नियमित रूपमा यस्ता प्रक्रिया अपनाउँदै आएको जनाएको छ ।