काठमाडौं । त्रिभुवन अन्तर्राष्ट्रिय विमानस्थल विस्तारको काम तीव्र गतिमा अघि बढेको छ ।
नेपाल नागरिक उड्डयन प्राधिकरणले त्रिभुवन विमानस्थलको क्षमता अभिवृद्धिका लागि भइरहेको कामका बारेमा स्थलगत जानकारी गराउदै विमानस्थल विस्तारको काम तीव्र गतिमा अघि बढेको र करिव अन्तिम चरणमा पुगेको जनाएको हो ।
धावनमार्ग जोड्न पूर्वतर्फ र पश्चिमतर्फ नयाँ ट्याक्सी वे निर्माण भइरहेको र यसका कारण रनवे क्षमता २५ प्रतिशतले बढ्ने अपेक्षा राखिएको छ । प्राधिकरणले विमानस्थल भित्र रहेको आयल निगमको डिपो हटाउनुपर्ने र डिपो नहटे समानान्तर ट्याक्सी वे निर्माण अवरुद्ध हुन सक्ने जनाएको छ ।
बुद्ध एयरको ह्यांगरको दक्षिण क्षेत्रमा दुई वटा ह्यांगर निर्माण हुने र उत्तरपट्टी नेपाल एयरलाइन्सको एउटा ह्यांगर निर्माण हुने बताइएको छ । त्यस्तै, अहिलेको स्थानमा रहेको नेपाल एयरलाईन्सको ह्यांगर र नेपाली सेनाको भिभिआइपी सारेपछि सोहि स्थानमा त्रिभुवन विमानस्थल विस्तार गुरुयोजना अन्तर्गत सुविधासम्पन्न दोस्रो अन्तर्राष्ट्रिय टर्मिनल भवन निर्माण बन्ने योजना छ ।
दोस्रो अन्तर्राष्ट्रिय टर्मिनल भवन निर्माणका लागि ठूलो बजेट आवश्यक पर्ने भएकाले यसमा सरकारसंग थप छलफल गर्न आवश्यक भएको प्राधिकरणको भनाइ छ । नयाँ अन्तर्राष्ट्रिय टर्मिनल भवन निर्माण भएपछि अहिलेको अन्तर्राष्ट्रिय टर्मिनललाई आन्तरिक टर्मिनल बनाउने तयारी छ ।
