गुल्मी । गुल्मीका किसानहरु यतिबेला खेतमा धान रोपाइँमा व्यस्त बनेका छन ।
वर्षा शुरु भएसँगै यहाँका किसानहरुलाई खेत रोपाइँको चटारो बढ्दै गएको छ । केही ठाउँमा पानीका मुहानहरु नफुटेका कारण छिटफुट रुपमा टारीहरुमा रोपाइँ नभए पनि जिल्लाका अधिकाँस स्थानमा यस पटक समयमै धान रोपाइँ भएको छ ।
कृषि ज्ञान केन्द्र गुल्मीका अनुसार यस पटक जिल्लामा ले जनाएको छ । साउन महिनाको दोश्रो सातासम्म आईपुग्दा जिल्लामा हालसम्म ८७ प्रतिशत क्षेत्रफलमा धान रोपाइँ भैसकेको छ । जिल्लामा ७ हजार ९ सय ८८ हेक्टर क्षेत्रफल मध्य ६ हजार ९५० हेक्टर क्षेत्रफलमा धान रोपाइँ भएको छ ।
गत वर्षको तुलनामा यस पटक खेत रोपाइँको प्रतिशत बढेको छ । गत वर्ष यस अवधिसम्म आईपुग्दा ७६ प्रतिशत क्षेत्रफमा मात्र धान रोपाइँ भएको थियो । समयमा पानी परेका कारण किसानहरुले यस पटक छोटो अवधिमा धेरै खेत रोप्ने अवशर पाएका हुन । यस पटक धान रोपाइँ गर्ने प्रतिशत बढेपनि रोप्ने खेतको क्षेत्रफल भने घट्दै गएको बताईएको छ । जसका कारण धान उत्पादन हुने क्षेत्रफल मध्य यस वर्ष जिल्लामा ९० प्रतिशत खेतमा मात्र धान रोपाइँहुने अनुमान छ ।
खेतमा धान रोपाइँको क्षेत्रफल घट्नुको मुख्य कारण जनशक्तिको अभाव, बढ्दो बसाईसराई, गोरुको अभाव, समयमा जोत्नका लागि ट्याक्टर नपाउने, खोलाको कटान, महँगो ज्याला लगायतका समस्या भने यथावत रहेको छ ।
जिल्लामा धान उत्पादनको कुल क्षेत्रमध्ये गत वर्ष चैते धान एक हजार २ सय ८६ र वर्षे धान २३ हजार १ सय ४० मेट्रिकटन उत्पादन भएको बताईएको छ ।
